Legkuq Sinih Rugang

Lagkgu' Sinih Ruggang

Lakuh by Sarah Sakai

Lagkgu' sinih ruggang-ruggang

Lagkgu' daring-daring baruh midang

Lungung adto sinih liang langit

Lagkgu' naganit lamud marait

Nah-nutuk mupa udung kiran dalit

Kan mupa pa'ad madting lam wat

Gagap uih pelaba taut

Awe' ini rasab Tuhan ranga' Iah nalan

Rasab malaikat nalan maya' liang ladan

Maya' liang sibo langit rikan

Kasu nah mungu' tah wih sembahyang

Ngalinuh anak kudih paki-paki inan

Nange dah kerja lam bawang tuan

Naam man narih karab tulung idah

Nuk adtan baruh naam mantah narih milah

Milah naru' lati' mantah uih narah idang

Ngarabut uduh maya' lam linayang

Mirat kian narih lat lam wang

Kan kian lau' kayu' abpa' udan

Ame mikak lati' lam arur Payang

Lati' uih ngarabut uduh lam linayang

Uduh tinih mapat naam ludan-ludan

Mait man idang tinih narih naam taan

Idang male taran mantah anak kail tulang

Lati' lamibal puun uih lamibal raan

Ame mikak lati' ngi Arur Tuar

Nah naru' lapo uih daun kanangan

Nibu bua' datu' lamud bua' kiran

Nibu bua' bubpuh pah nangan

Nibu kayuh garu' maya' liang raan

Nibu kayu manis kuh lam rang

Awe adtah burur la' ngitun ngadan

Mala lakuh ngudah tiah do' ruggang-ruggang

Lakuh binala tinih bare kuh ngan Tuhan

Kan mala Amin-Amin mantah uih lam sembayang

Dih manidun dih lakuh